TALLER DE MATES: ANIVERSARIOS

No taller de mates seguimos a traballar cos números inspirándonos no conto "Crecer" e, nesta ocasión, tocoulle a uns números moi especiais e significativos para nós: os das nosas datas de nacemento.

 

Primeiro, fomos colocando as nosas fotos e rodeando o día do noso aniversario no mes correspondente.

Tamén descubrimos que cada mes se corresponde cun número: xaneiro é o mes número 1, febreiro o 2 e así sucesivamente ata decembro. E estes números empregámolos para escribir a data curta na nosa táboa de rexistro.

TALLER DE MATES: ALTURA

No taller de mates continuamos traballando co conto "Crecer".

Despois da investigación dos números dos nosos pés, pasamos a traballar a altura. Para iso, botamos man dunha cinta métrica que pegamos na pizarra porta do espazo fedelleiro.

Por parellas, un colocábase pegadiño á porta mentres o compañeiro/a ía marcando cunha regra e un rotulador na altura correspondente. 

A continuación, comprobamos o número indicado na cinta métrica e escribimos ao lado o noso nome.

Finalmente, cubrimos a táboa de rexistro buscando o noso nome e escribindo ao lado a cifra correspondente a nosa altura.

Esta actividade serviunos para comprobar que non todos medimos o mesmo. Comprobamos quen é o máis alto/a da clase, o máis baixo, os que miden o mesmo...

TALLER DE MATES: NÚMERO DE PÉ

Hoxe, no taller semanal adicado as mates, comezamos o traballo en relación co marabilloso conto "Crecer" de Eleonora Marton.

Nesta ocasión, descubrimos que os números están por todas partes, incluso nos nosos pés. E por iso, comezamos a investigar o número de pé de cada neno/a.

Primeiro, comparamos a simple vista.

A continuación, buscamos o número que hai en cada zapato. Comprobamos que non sempre aparece no mesmo sitio.

Unha vez feito isto, rexistramos na pizarra-porta do espazo fedelleiro o número de pé de cada un ao lado do noso nome.

Finalmente, comprobamos quen ten o número maior e, polo tanto, o pé máis grande, quen ten o máis pequeno, cantos nenos/as da clase teñen o mesmo número...